LAOAG CITY – Nagballaag ti Ilocos Norte Police Provincial Office iti publiko a saan a dagus nga agtalek kadagiti agturturong kadagiti pagtaengan.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, masapol nga agbalin a naalerto dagiti umili nangruna kadagiti residente a masansan nga agbatbati iti uneg ti pagtaengan kas kadagiti natataengan.
Inbatadna a saan a dagus nga agtalek kadagiti mangididiaya kadakuada kadagiti produkto wenno dagiti ibagbagada a nangabak iti raffle draw.
Inlawlawagna a daytoy ti maysa kadagiti wagas nga ar-aramiden dagiti managgundaway tapno maallilaw dagiti tattao.
Maipalagip nga adda ti nagbalin a biktima ti budol-budol gang nga agtawen iti 89 a residente iti ili ti Bacarra no sadinno nga adda ti nangidiaya kenkuana kadagiti appliances ken maipagarup a nangabak ti raffle draw.
