LAOAG CITY – Nagpalagip ni P/Col. Frederick Obar, Provincial Director ti Ilocos Norte Police Provincial Office iti umadanin a panangrugi ti panagkampania para kadagiti local candidates ditoy probinsia.
Kagiddan iti daytoy, inbatadna a nakasaganan dagiti nagduduma a City ken Municipal Police Station tapno maipasigurado nga agbalin a nalinak, naurnos ken natalna apaman a pormalen a mangrugin ti panagkampaniada.
Inlawlawagna nga agtultuloy nga aktibo ti panangipatungpalda ti Timpuyog program tapno maidanon kadagiti maseknan nga umili ti rumbeng ken saan a rumbeng nga aramidenda ita nga eleksion.
Kunana nga adda iti green category ti Ilocos Norte a mangipasimudaag nga awan ti nabara unay nga aglalaban iti 2025 Midterm Elections.
Nupay kasta, inpetteng ni P/Col. Obar a saan nga agpakampante dagiti otoridad tapno mapagtalinaed ti nakappia a komunidad ditoy probinsia.
