LAOAG CITY – Nangiyuswat ti Ilocos Norte Police Provincial Office ti nagduduma nga aktibidad iti Aurora Park ditoy ciudad ti Laoag, a pangisayangkatan ti rally dagiti grupo dagit agtutubo mainaig iti pananglagip ti martial law.
Segun ken ni P/Lt.Col. Michael Bautista, ti pannakangiwat ti Ilocos Norte Police Provincial Office, alas-singko itay parbangon nga insayangkat da ti zumba dance a nakipartisiparan dagiti kameng ti Philippine National Police, estudyante, empleado ti gobierno probinsyal ken dadduma pay.
Malaksid iti daytoy, adda pay dagiti manarimaan a maisaysayangkat a libre a panagpukis, panagmasahe, bloodletting activity ken adda pay ti banda no sadinno nga agpatingga dagitoy nga aktibidad intono alas-siete ita a rabii.
Inlawlawag ni Bautista a ti ar-aramiden da ket saan a pananglapped iti rally no di ket kayat laeng nga i-launch ni Provincial Director Police Col. Joemar Lubiano ti maipapan iti linaon ti bible verse a Mateo 5:9 a pakabasaan ti “Pinagpala ang mga gumagawa ng paraan para sa kapayapaan, sapagkat sila’y ituturing na mga anak ng Diyos”.
Kabayatanna, inpasigurado ni Bautista nga adda ti umdas a bilang da tapno agbantay ken masigurado ti seguridad ken kinatalged dagiti lugar a pakaisayangkatan ti rally mainaig iti pannakalagip ti maika-53 a tawen ti martial Law.
