LAOAG CITY – Ti pannakawaya-waya laeng manipud iti detention facility ti International Criminal Court (ICC) ti kiddaw ni Vice President Sara Duterte iti maika-80 a panagkasangay ti amana a ni dati a Presidente Rodrigo Duterte ita nga aldaw.
Nagpanawagan daytoy iti publiko a saan a liplipatan nga iraman iti panagkararagda ti dati a Presidente a maipaayan ti nasayaat a salun-at ken atiddog a biag.
Kunana a napateg nga ikararag ti al-alisto a pannakawaya-waya ti dati a Presidente.
Maipalagip nga adda iti International Criminal Court ti dati a Presidente gapu ta sumangsango daytoy iti kaso a crime against humanity gapu iti panagkampaniana kontra iti iligal a droga iti terminona.
