LAOAG CITY – Inpakaammo ni Mr. Yassin Ampuan Abidin ti Ilocos Norte United Muslim Association dagiti nagduduma a tradision kageddan iti panangrugin ti Ramadan ita nga aldaw, Marso 2.
Inbatadna a ti moon sighting wenno hilal sighting ket napateg a practice iti Islam a mangipasimudaag ti panangrugi ti baro a lunar month.
Inlawlawagna a napateg ti moon sighting iti tradision ti Islam tapno masigurado ti accurate a panangobserbar ti Ramadan a gagem iti panagkaykaysa dagiti muslim.
Kunana a maisayangkat ti fasting ken aggegeddan a panagkararag dagiti Muslim para iti panangobserbar ti Ramadan.
Innayonna a babaen iti daytoy ket saanda a mabalin a mangan manipud iti parbangon aggingga saan pay a limnek ti init ken adda pay ti panagkararagda ken panagbasa ti Quran.
Naammoan a ti laeng mabalinda nga ipauneg a taraon ita a Ramadan ket dagiti halal kas ti prutas ken liklikanda dagiti haram kas ti pork-related products, alcohol ken panagsugal ken dadduma pay.
Kabayatanna, ita nga aldaw ket pormal a nangrugin ti pannakaselebrar ti Ramadan nga agpaot iti uneg ti 30 nga aldaw.
