LAOAG CITY – Nakipaset ti Ilocos Norte United Muslim Association kadagiti sumagmamano nga aktibidad ti Eid’l Fitr.
Segun ken ni Mr. Yassin Ampuan Abidin, pannakabagi ti Ilocos Norte United Muslim Association, naannayas ken awan ti nagbalin a problema iti pannakaisayangkat kadagiti aktibidad iti Eid’L Fitr a mangipasimudaag ti panagngudon ti Ramadan.
Inbatadna a babaen iti daytoy ket nalpasen ti 29 nga aldaw a panag-fasting wenno panagayunoda kas paset iti tradisionda kas maysa a Muslim.
Inlawlawagna nga apaman a nakitada ti moon sighting ket isu ti paglasinan iti pormalen a panangrambakda iti Eid’L Fitr.
Mainaig iti daytoy, inpakaammo ni Abidin a kaaduan kadakuada a Muslim ket agisuot ti baro a bado, mangan ti naiimas a taraon ken dadduma pay kas panangselebrar iti ibilangda a nangina nga aldaw.
Innayonna a ti pudno a mensahe iti panangrambak ti Eid’L Fitr ket ti agtultuloy a panagkararag ken ti naiget a panagkaykaysa dagiti amin a Muslim.
