LAOAG CITY – Selebraran ti Ilocos Norte United Muslim Association ti Eid al-Fitr ti tallo nga aldaw.
Daytoy ket kalpasan ti panagngudo ti selebrasionda ti Ramadan ita nga aldaw.
Segun ken ni Mr. Yassin Abidin, ti Islamic Scholar iti Ilocos Norte United Muslim Association, kalpasan ti makabulan a panag-fasting wenno panagayuno ket adu dagiti pamilia a Muslim ti mapan kadagiti baybay tapno agdidigus ken agsasango dagitoy a mangan.
Inbatadna a nupay man nalpasen ti Ramadan ket nasken latta nga itultuloyda dagiti nasasayaat nga ar-aramiden kas ti kalikagum ti Allah dagitoy.
Inlawlawagna a masapol nga ibati dagiti dakes nga aramid tapno agbalin a nasayaat ti biagda iti masakbayan.
Kunana a daytoy nga aldaw ket maibilang a fiesta dagiti Muslim isu nga adu kadakuada ti agragragsak ken agtitipon kadagiti pagtaenganda.
Innayonna a daytoy nga aldaw ket panangited ti dayaw iti Allah gapu ta nakumpletoda ti 30 nga aldaw a panagayuno.
