LAOAG CITY – Kalikagom ti Ilocos Norte Water District (INWD) nga ileppas dagiti naruay a proyekto da ita a tawen.
Daytoy ti inrakurak ni Ilocos Norte Water District General Manager John Teodoro.
Kuna ni Teodoro nga adda da pay dagiti saan a nalpas a proyekto da idi 2024 nga isu iti maysa kadagiti iprayoridad da nga ituloy ita a tawen.
Inbatad na a ti kangrunaan a kalikagom da a solusyonan ket ti kaawan ti suplay a danom kangrunaan na dagiti barangay iti South of the River.
Innayon na a nakikoordinar da metten iti Prime Water para iti alisto a pannakasolbar ti problema a kaawan ti danom kadagiti maseknan a barangay, uray saan da pay a maipatungpal dagiti dadduma nga infrastructure projects da.
Kabayatanna, inpakaammo ni Teodoro nga adda ti maipatungpal a customer price index iti bayadan dagiti konsesionaryo intono Pebrero, a daytoy ket nakabase iti inflation rate.
Kuna na a 2.3% ti mainayun iti bill dagiti konsesionaryo, ken gagem ti nasao nga addang ket tapno adda met ti mapasubli ti Prime Water manipod iti ipupuunan da iti panangpalawa kadagiti proyekto da.
