LAOAG CITY – Naragsak nga inpakaammo ni Mr. Weenter Ventura, Ilocos Norte Youth Development Office a nangnayon ti opisinada ti maysa a Professional Psychological First Aider gapu iti umad-adu nga agpatpatulong kadakuada.
Inbatadna nga iti agdama ket addan ti uppat a Professional Psychological First Aider nga agserserbi iti Speak Up I’m Here program.
Kunana a daytoy ket mangipasimudaag nga in-inoten a maiyam-ammo ken maiyas-asideg ti nasao a programa kadagiti umili nga agkasapulan ti naan-anay a tulong.
Inpasingkedna a nakalukat ti hotline-da iti 24/7 tapno aniaman nga oras ket adda ti sumungbat kadagiti saludsod wenno kiddaw dagiti agpatulong no sadinno a kabinnuligda ditoy ti Mariano Marcos Memorial Hospital and Medical Center ken dagiti dadduma pay a mental health institutions.
Innayonna a ti kangrunaan a maaw-awat a problema ti opisinada ket ti anxiety ken depression.
