LAOAG CITY – Inbatad ni International Olympic Committee President Thomas Bach, a butosan ti International Olympic Committee (IOC) inton sumaruno a bulan ti pannakairugi ti makabaro nga Olympic Esports Games, a manamnama a kangatuan a pammadayaw para kadagiti esports players.
Nabayagen nga ad-adalen ti International Olympic Committee ti Esports ken nangbukel iti komision para kadagiti gundawayna.
Idi 2021, inrugida ti Olympic Virtual Series kas pilot project iti Esports.
Segun ken ni Bach iti maysa a press conference, babaen ti pannakairugi ti Olympic Esports Games, umab-abante ken makibagay ti International Olympic Committee iti trend digital revolution.
Kabayatanna, ti singasing ti executive board ti International Olympic Committee ket mabutos iti session iti Paris Olympics inton sumaruno a bulan, bayat a ma-evaluate dagiti potensial a pagilian a mangsangaili.
