LAOAG CITY – Inrakurak dagiti pamilya dagiti natay iti nalawa ken nadamsak a tignay-protesta iti Iran a maipagarop nga agkidkiddaw ti dakkel a kantidad ti Iranian authorities kasukat ti panangisubli da kadagiti bangkay dagiti natay a protesters.
Rumrumuar a dagiti bangkay dagiti protesters ket naka-hold kadagiti punerarya ken ospital, ken saan a maited laeng iti pamilya da no awan ti ited da a kwarta.
Basar iti maysa a pamilya iti northern city ti Rasht, dumawdawat ti 700 million tomans ti security forces tapno maiparuk-at ti bangkay ti ipatpateg da iti biag a naka-hold iti Poursina Hospital mortuary karaman ti 70 a sabsabali pay a pimmusay a protesters.
Kabayatanna, iti met Tehran a kabisera ti Iran, maysa a pamilya ti Kurdish seasonal construction worker ti dinawatan dagiti otoridad ti bilyon tomans tapno maala da ti bangkay ti pimmusa a protester.
Nupay kasta, gapu ta saan a kabaelan ti pamilya nga ited ti kidkiddawen dagiti otoridad a kwarta, napilitan da a pimmanaw a saanda a naala ti bangkay ti ipatpated da ti biag.
Iti agdama, adda ti pakabuklan a 2,435 a tattao ti natay iti nasurok a dua a lawas a tignay protesta idiay Iran.
