LAOAG CITY – Maysa a barko ti mapagat-atapan nga us-usaren kas “floating armoury” iti Gulf of Oman ti maipagarup a kinumpiskar dagiti kameng ti militar ti Iran basar iti maritime risk management company.
Nadakamat a naudi a nakita ti Honduras-flagged vessel nga Hui Chuan iti 70 a kilometro iti amianan a daya ti Fujairah iti United Arab Emirates idi Mierkoles.
Inbatad ti operator ti Hui Chuan a maipagarup nga us-usaren ti barko kas floating armoury wenno pangikabilan dagiti armas para kadagiti private security firms a mangprotprotekta kadagiti barko kontra kadagiti panangatake dagiti pirata iti kabaybayan.
Nupay kasta, saan pay a makumpirmaran no ania a klase ti armas ti nakalugan iti barko ken no asino dagiti agus-usar kadagitoy.
Immunan a naipadamag a masansan nga us-usaren dagiti floating armoury vessels iti Red Sea, Gulf of Aden ken Gulf of Oman tapno agserbi a drop-off ken collection point dagiti armas ken bala para iti maritime security personnel.
