LAOAG CITY – Inpaganetget ni Iranian President Masoud Pezeshkian a saanna a kayat nga iyalu-od pay ti gubat a nagbaetanda ti Israel.
Nupay kasta, nakasaganada a bumales ti aniaman nga aramiden a panangatake iti teritorioda.
Inwayat ti Iranian President ti rakurak idi tawagan isuna ni Turkish President Recep Tayyip Erdogan.
Inpettengna a saan nga isuda ti nangirugi ti gubat no sadinno a gapu iti daytoy ket naruayen a sibilian ti pimmusay pakairamanan dagiti scientist ken military leader-da.
Naammoan nga agdepende laeng ti pannakipaset daytoy iti nuclear talks idiay Estados Unidos no nagsardengen ti ar-aramiden a panangraut ti Israel.
Inpasigurado met ti Presidente ti Turkey a nakasaganada a bumallaet tapno naan-anayen nga agsardeng ken maipababa ti tension iti nagbaetan ti Israel ken Iran.
Maipalagip nga adda ti 24 nga indibidual ti natayen iti Israel ken 592 met ti nasugatan idinto nga iti Iran ket dumanonen it 224 a tattao ti pimmusayen sipod idi nangrugi ti panangatake ti Israel idi Biernes.
