LAOAG CITY –Nagturong iti Qatar ni Iranian Foreign Minister Abbas Araghchi para iti konsultasion mainaig kadagiti baro a pasamak iti Middle East sakbay a nagderetso iti New York tapno agatendar iti United Nations General Assembly.
Pimmanaw ni Araghci iti Tehran ken nagipatulod ti pormal a pakaammo iti estado iti babaen ti maysa nga state media news agency mainaig iti temporario a panagsardengna iti Doha, pagilian a mangibabaet iti Estados Unidos ken Iran.
Naangay ti panagbisita iti Doha kagiddan ti rakurak dagiti opisial ti Iran a kalikagumda nga ipadanon iti babaen dagiti madeiator ti kondisionda tapno leppasen ti blockade iti Strait of Hormuz.
Iti agdama, kiniddaw ti Tehran kadagiti barko a dumalyasat a mangala ti pammalubos sakbay ti panagdalyasatda iti nasao a lugar para iti seguridad ken soberanya, bayat a maad-adal ti pannakaipatungpal ti service fees kadagiti aglabsing ti nasao a pagalagadan.
