LAOAG CITY – Inpakaammo ni Atty. Donato Balderas Jr. ti Schools Division Superintendent iti Department of Education ti Ilocos Norte a maiyakar ti iskedyul dagiti outdoor activities para iti Region 1 Athletic Association Meet iti baet ti pangta ti heat index.
Segun kenkuana, nasken a maiyuswat ti panagay-ayam dagiti umaayam nangruna iti athletics kas ti basketball, volleyball, baseball ken dadduma pay iti oras ti alas sais ti bigat ken naladaw iti malem tapno saan a nabara ti panawen.
Inbatadna nga iti ay-ayam a football ket mabalin nga agingga rabii ti panagay-ayamda gapu ta adda met dagiti mausar nga equipment ken facilities kas ti silaw a mangparaniag iti aglawlaw ti pagay-ayaman dagitoy.
Inlawlawagna a dagiti met agay-ayam ti taekwondo, arnis, table tennis ken billiards ket saanda unay maapektaran ti iskedyul ti panagay-ayamda gapu ta maibilang daytoy kas indoor activities.
Kunana a maiyuswat ti opening parade ti Region 1 Athletic Association Meet iti oras ti 4:30 ti malem tapno maliklikan ti napudot a paniempo.
Innayonna a nagkiddaw daytoy kadagiti health practitioners ditoy probinsia nga imonitorda dagiti amin nga atleta bayat ti panagay-ayamda tapno maipasigurado ti kinatalged iti salun-atda.
Immuna iti daytoy, naammoan a maiyuswat ti Region 1 Athletic Association Meet inton Abril 22 no sadino host ditoy probinsia.
