LAOAG CITY – Nangiwayat ti deadly strikes ti Israel Defense Forces idiay Gaza.
Daytoy ket kalpasan a natay ti dua a suldado iti maipagarup a panangatake ti Hamas kadakuada.
Gapu iti daytoy, inrakurak ti Israeli security official ti pannakasuspenso ti pannakai-deliver dagiti tulong iti lugar.
Nagsubli da United States special envoys nga isuda Steve Witkoff ken Jared Kushner iti rehion idinto a dagiti Hamas negotiators ket nakitaripnong kada Egyptian mediators ken Palestinian factions idiay Cairo.
Manamnama a ditoy a matalantan ti maikadua a phase ti Trump’s 20-point peace plan nga adda ti pakainaiganna iti international stabilization force idiay Gaza, panagtalaw ti Israel Defense Forces ken panangikkat ti armas dagiti Hamas.
Basar kadagiti local hospital, adda ti 45 a Palestino ti natay gapu iti panangraut ti Israel Defense Forces pakairamanan ditoy dagiti sumagmamano a miembro ti Hamas kas ti commander, sibilian ken dagiti ubbing.
Maipalagip nga iti napalabas laeng a lawas ket naipaayan ni United States President Donald Trump ti hero’s welcome idiay Israel kalpasan a naipatungpal ti Gaza ceasefire ken panagsinnukat dagiti Israeli hostages kadagiti Palestinian prisoners.
