LAOAG CITY – Inrakurak ni Israeli Prime Minister Benjamin Netanyahu nga inaprobaranen ti Israel ti umuna a tukad ti Gaza deal a mangipaay iti pannakaipatungpal ti ceasefire ken pannakawaya-waya kadagiti hostage.
Agbalin nga epektibo ti ceasefire apaman a mangipaayen ti panangaprobar ti Israeli cabinet.
Iti babaen ti katulagan, adda ti 24 nga oras ti Israeli military tapno ibabawi nga apagapaman dagiti suldadoda manipud idiay Gaza.
Sarunoen daytoy ti panangwaya-waya ti Hamas kadagiti amin a nabatbati pay nga hostage nga Israelis iti uneg ti 72 nga oras idinto a paruk-atan met ti Israel ti ginasgasut a balud a Palestino.
Iti kanito a marugianan ti katulagan, palubosanen ti aid trucks a makaipatulod ti tulong iti dua a milyon nga umili ti Gaza a timmalaw gapu iti gubat.
Kabayatanna, mangipatulod ti Amerika ti agarup 200 a suldado daytoy iti Middle East tapno kitaen ti pannakaipatungpal ti ceasefire deal pakairamanan dagiti suldado manipud idiay Egypt, Qatar, Turkey ken United Arab Emirates.
Naammoan nga awan ti tropa ti Estados Unidos ti agturong idiay Gaza ngem mangipasdek dagitoy ti maysa a coordination center idiay Israel tapno suportaran ti stabilization effort.
