LAOAG CITY – Nangiyuswat ti Israel ti kabaroan a panangatake na iti Gaza kalpasan ti panangibilin ni Prime Minister Benjamin Netanyahu iti militar a dagus a mangiwayat iti inawagan na a “powerful” attacks
Basar iti report ti Hamas-affiliated Gaza Civil Defence, umabot iti siyam a tattao ti natay gapo iti daytoy.
Naamoan nga uppat ti natay kalpasan a timmama ti strike ti Israel iti pagtaengan dagiti sibilyan iti al-Sabra neighbourhood, abagatan ti Gaza City no sadinno dagiti biktima ket tallo a babbai ken maysa a lalaki.
Dagiti met lima pay a pimmusay ket kalpasan a tinarget ti Israel ti civilian vehicle iti Khan Younis no sadinno dagiti biktima ket dua a lallaki, maysa a babai ken dua nga ubbing.
Ak-akusaran ti Israel ken Hamas ti tunggal maysa iti pananglabsing iti ceasefire, ken inbatad ti Israel’s defense minister a rinaot ti Hamas dagiti soldado da iti Gaza ngem naglikudan daytoy ti militante a grupo.
Namunganay daytoy iti pannakaduktal ti Israel a ti lungon nga insubli ti Hamas ket saan a naglaon iti bangkay ti pimmusay nga hostage.
Mainaig iti daytoy, inbatad ti Hamas a laplapdan ti Israel ti panagbirok da kadagiti bangkay iti Gaza Strip a mangituntunda iti pannakaitantan ti pannakaipaima iti bangkay dagiti natay nga hostage.
Kabayatanna, inakurasan ti Turkey ti Israel nga isuna ti manglablabsing iti ceasefire agreement.
