LAOAG CITY – Mismo a ni Mayor Michael Marcos-Keon ti napan nangsabat iti Laoag International Airport (LIA) ken ni Israeli Ambassador to the Philippines, His excellency Rafael Harpaz iti ibibisita na ditoy ciudad ti Laoag.
Naamoan a saan laeng a ditoy ciudad ti Laoag ti bisitaen ni Harpaz no di ket iti pay nagduduma a lugar ditoy pagilyan.
Gagem ti ibibisita ni Harpaz ditoy pagilyan ket ad-adda pay a mapatibker ti relasyon ti Israel ken Pilipinas.
Inbatad na a daytoy ti kaunaan a gundaway nga immay bimmisita ditoy ciudad ti Laoag, ngem nabayagen a kayat na ti umay bumisita gapu ta ado dagiti napipintas a mangmangngeg na maipanggep ditoy ciudad.
Innayon na a nabayagen a mangmangngeg na ti kinapintas ditoy ciudad ti Laoag babaen ti maysa a taga Laoag a binigbig na a ni Gemma Calapini a nangaywan kadagiti annak na idi babassit da pay, addan 20 a tawen ti napalabas.
