LAOAG CITY – Inrakurak ti Israeli army a mangiyuswat da ti inaldaw a “tactical pause” iti military activity iti sumagmamano a paset ti Gaza Strip tapno mapaalisto ti pannakaidanun ti tulong.
Inrakurak ti army a ti local ken tactical a pannakaisardeng ti panagpaputok ti military activity para iti humanitarian purposes ket binigat a maiyuswat agingga a manayunan ti abiso iti dalan manipod iti Kerem Shalom Crossing agturong iti Salah al-Din Road ken northwards.
Ti desisyon ket paset ti panangikarkarigatan a paigetan pay ti humanitarian aid a sumsumrek iti Gaza Strip kalpasan ti taripnong iti United Nations ken dadduma pay nga organisasyon.
Immunan nga inreport ti World Health Organization a nasurok a 8,000 nga ubbing nga agtawen ti lima ti maag-agasan gapu iti malnutrisyon iti Gaza.
Maipalagip nga ipilpilit pay ti international mediators nga umannugot ti Israel ken Hamas iti maysa a katulagan a pannakaisardeng ti rinnupak, a daytoy nga addang ket indasar ni US President Joe Biden tapno maikkan ti gundaway a mawaya-wayaan dagiti hostage-prisoner ken makaipaay ti ad-ado a tulong.
