LAOAG CITY – Supsuportaran ni Israeli Prime Minister Benjamin Netanyahu ti plano ni US President Donald Trump tapno malpasen ti gubat iti Gaza.
Personal a bimmisita ni Netanyahu iti White House ken kunana a ti nasao a desisyon ket maysa a kritikal nga addang tapno malpasen ti gubat ken magun-od ti kapya iti lugar.
Nagyaman met ni Trump kenni Netanyahu kalpasan nga inawat na ti plano na ken kunana a nakasagana nga idaulwan ti transitional “Board of Peace” para iti Gaza.
Mamati pa ni Trump a sumurot ti Hamas kadagiti kondisyon nga indatag na para iti panaglippas ti gubat.
Karaman iti plano ket ti temporaryo a panangidaulo ti technocrat government ti Gaza ken saan a mapalubusan ti Israel a mangsakop iti daytoy.
Awan ti pumanaw iti Gaza ken no inawat dan ti plano ket dagus a maisardeng ti gubat ken iti uneg ti 72 nga oras ket masapol a mawaya-wayaan dagiti hostages.
Maipaayan met ti Hamas ti amnestiya ken no kumontra ket maikkan met ti tsansa a makapanaw ken mapan iti pagilyan a mangawat kadakuada.
Naamoan a ti Regional ken International forces ket isu ti mangipaay ti seguridad ken sanayen na dagiti Palestine police ken amin a tulong ket makastrek iti Gaza.
