LAOAG CITY – Pinatawan manen ti Sandiganbayan Special Third Division ni Janet Lim Napoles ti reclusion perpetua wenno pannakabalud agingga iti 80 a tawen.
Daytoy ket gapu iti kaso a two counts of malversation of public funds nga adda ti pakainaigan iti saan a nainkalintegan a panangusar ti Priority Development Assistance Fund (PDAF).
Iti 165 a pinanid a desisyon ti Sandiganbayan ket napaneknekan a ni Napoles ken sumagmamano a kakadwa na ket guilty iti malversation of public funds ti pimmusay a ni Benguet Rep. Samuel Dangwa nga agbalor ti P19-milyon.
Nailanad iti linteg a ti tao a karaman iti malversation of public funds ket mabalin a mapatawan ti reclusion perpetua no aglabes iti P8.8-M ti maibulsa na.
Naamoan a dagiti met kaso ni Dangwa ken tallo a sabsabali pay ket naibasura kalpasan ti pannakatay ti kongresista.
