LAOAG CITY – Inarestar ti National Bureau of Investigation (NBI) ti dati nga agirakrakurak ken television host a ni Jay Sonza iti pagtaengan na idiay Quezon City mainaig iti kaso a cyberlibel.
Inbatad ni National Bureau of Investigation Director Melvin Matibag a nangiparuk-at ti warrant of arrest ti Pasay City Regional Trial Court nga isu ti inserbi da iti panangarestar da iti dati a broadcaster.
Iti agdama ket adda iti kustodiyar ti National Bureau of Investigation ni Sonza.
Kabayatanna, dagus a nangiparuk-at ti statement ti abogado ni Sonza a ni Atty. Mark Tolentino a siguradwen na a maprotehiran ti karbengan ti kliyente na, aglalo ket maysa daytoy a senior citizen.
Namonganay ti kaso iti reklamo nga inpila ti National Bureau of Investigation idi Pebrero ita a tawen kontra kada Sonza ken vlogger a ni Jeffrey Luces Celiz, wenno ad-adda a mabigbig kas “Ka Eric Celiz,” gapu iti maipagarop a panagiwaras da ti peke a medical records ni Presidente Ferdinand Marcos Jr.
