LAOAG CITY – Kinumpirmaran ni Mr. Edison Aquino, dispatcher iti ruta a Laoag-Piddig Jeepney Terminal nga adda iti impluwensia ti nasanger a nagpasada ti maysa a jeepney driver a ni Mr. Leo Ulep a residente ti Barangay Loing iti ili ti Piddig.
Segun kenkuana, naammoanda a nakiinom ti nasao a driver kadagiti pagayamna a tricycle drivers nga asideg met laeng iti Laoag-Piddig Jeepney Terminal.
Gapu iti daytoy, kinasaritada ti maseknan a driver a saanen nga agbiahe pay gapu ta nakainom daytoy.
Nupay kasta, inpetteng ti driver kadakuada a kabaelanna pay laeng ti agpasada isut gapuna nga inpalubosda met nga agbiahe daytoy.
Inbatadna a gapu iti napasamak ket saandan a pinalubosan pay nga agpasada ti driver ita nga aldaw no sadinno nga adda ti planoda a patawan ti maysa a bulan a pannakasuspenso iti panagpasada daytoy para iti pagmenna-mennaanna.
Kunana a basar iti palawag ti driver kadakuada ket adda ti linisianna a nag-overtake kenkuana a rason ti panagpaigidna iti kalsada.
Mainaig iti daytoy, inpakaammo ni Aquino a manamnama a mangipaay ti komento inton bigat ni Mr. Fedelino Lizardo, ti Presidente ti Laoag-Piddig Jeepney Terminal maipanggep iti pinal a maipataw a pannusa kontra iti nasao a driver.
Immuna iti daytoy, adda ti naawat a reklamo ti Bombo Radyo Laoag manipud iti maysa a concern citizen a maipagarup a nabartek ti maysa a jeepney driver a nagpasada ken makumikom a makitungtungtong wenno makitsis-tsismis iti pasahero nga adda iti sango ti jeepney.
