LAOAG CITY – Mamati ni Junior Governor Princess Emriche Jhoye Carag manipod iti Ilocos Norte National High School nga ado dagiti masursuro na kas junior official ditoy probinsya.
Inbatad na nga amin a masursuro na iti pannakapili na kas Junior Governor ket saan nanto a pulos a malipatan sadinno man ti pagturungan na.
Kuna na a daytoy ti umuna ken maudi a panagakem na kas junior governor gapu ta daytoy ket Grade 12 nan.
Iti baet nga ibilang na kas parabor ti pannakapili na kas Junior Governor ket saan a maliklikan a makarikna ti pressure aglalo ket iti umuna nga aldaw na paylaeng ket addan ti adal a nasursuro na gapu iti pannakaladaw na.
Innayon na a gapu iti pannakaladaw na ket inbalakad ni Governor Cecilia Araneta-Marcos a napateg ti oras isut gapuna nga inkari na met a saanen a maulit daytoy.
Kabayatanna, inrakurak met ni Junior Vice Governor Dayne Seandrake Sapaden manipod iti Mariano Marcos State University – Laboratory High School nga usaren na ti panagbalin na kas junior official tapno idanun dagiti problema ken isyu a sangsangwen dagiti pada na nga agtutubo kas ti Mental ken Physical Health.
Naamoan a ni Sapaden ket addaan ti adbokasiya a napaulwan ti ‘Tulong, Sulong para sa Kapakanan ng Kalusugan at Kapayapaan ng bawat Kabataan” a ti kangrunaan a gagem na ket para iti pagsayaatan dagiti komunidad.
Innayon na a plano da ti mangikabil ti kahon kadagiti pagadalan tapno isu ti pagikabilan dagiti estudyante dagiti pakaseknan da wenno isyu a kayatda a matratar, kasta pay dagiti mapaspasaran da a problema tapno masolusyunan.
