LAOAG CITY – Inpasingked ni Carmelo Agmata, agtawen iti 50, naasawaan, taga Barangay 9, Sarrat, Ilocos Norte ngem naikamang iti Barangay 19 ti nasao nga ili a saan nga aglaklako iti illegal a droga.
Reaksyon daytoy ni Agmata kalpasan a natiliw iti naiyuswat a drug-buy-bust operation iti paset ti Barangay 20 iti ili a Sarrat.
Inadmitir na a napadasan na idi ti nagusar ti shabu ngem inpasingked na a saanna pulos a napadasan ti naglako iti illegal a droga.
Segun kenkuana, kaanakan ken helper ni Vice mayor Editho Balintona iti ili a Sarrat.
Iti interview iti Bombo Radyo Laoag, inlawlawag ni Agmata a bayat a nakalugan ti motorsiklo na nga agturong koman iti balay ti bise mayor ket pinagsardeng dagiti pulis, kalpasan na ket pinababa, pinagpakleb ken pinosasan dan gapu ta ak-akusaran da daytoy nga aglaklako iti illegal a droga.
Innayon na a bayat a nakapakleb ket maipagarop nga adda inkaot da ti bulsa na kalpasan na ket inpakita dan ti maysa a sachet a naglaon iti shabu.
Kabayatanna, Inpetteng ni Police Chief Inspector Roldan Suitos, ti chief of police iti PNP-Sarrat nga idi pay laeng rabii a monmonitoren da ni Carmelo Agmata kalpasan a maipagarop a naglako iti illegal a droga iti mismo a minatayan da iti Barangay 19 iti ili a Sarrat.
Inbatad ni Suitos a ni Agmata ket No. 9 Street level target iti ili a Sarrat ken mamati da nga aglaklako pay iti illegal a droga iti dadduma nga ili gapu ta adda dagiti gundaway nga agpukaw iti lugar da.
Segun kenkuana, naglako ni Agmata iti maysa a sachet a naglaon ti maipagarop a shabu nga agbalor iti 500 a pisos iti maysa a pulis a nagpammarang a poseur buyer.
Malaksid ti daytoy, iti panangkapkap da ken ni Agmata ket adda pay ti bassit a sachet a naglaon ti maipagarop a shabu a naala da a naipaipit iti wallet na.
