LAOAG CITY – Maysa nga estudiante idiay Ontario, Canada ti posible a nakagun-od ti Guinness World Record kalpasan a nakapartuat ti kabassitan nga arcade machine iti intero a lubong.
Inpakita ti Fanshaw College electromechanical engineering student a ni Victoria Korhonen ti inaramidna nga arcade machine a 2.5 inches ti kangatona, 1 inch ti kaakabana ken 1.3 inches ti kaatiddogna.
Ti bassit a makina ket agop-operar kas maysa a regular sized arcade machine ken makaay-ayam daytoy ti classic arcade game a Pong.
Rinukod ti maysa a civil engineering professor ti Fanshawe College ti napartuat nga arcade machine ni Victoria kas paset ti opisial a panangarisit para iti Guinness World Record.
No mapaneknekan iti kinabassitna, maabakna ti agdama a rekord nga iggem ti maysa nga arcade machine a 2.61 inches.
