LAOAG CITY – Naitampok iti documentary film nga ARSI a maysa a pakasaritaan ti kabibiag ni National Economic Development Authority Secretary Arsenio Balisacan.
Daytoy ket kas paset ti 2025 MMSU Film Festival para iti 47th Foundation Anniversary iti Mariano Marcos State University.
Segun kenkuana, adu dagiti kapadasanna iti panagbiag sipod idi ubing pay isuna agingga a nagun-odna ti pagtaktakderanna iti agdama.
Inbatadna a dakkel ti nagbalin nga impluwensia kenkuana ti panagadalna iti Mariano Marcos State University gapu ta ad-adda pay a naasa ti kapabilidadna.
Mainaig iti daytoy, kunana a dagiti documentary films a naipabuya dagiti nasisirib a film directors ket dakkel ti factors-na nangruna kadagiti agdama nga isyu.
Kabayatanna, iti panagbitla ni Dr. Shirley Agrupis, Commission on Higher Education Commissioner, kunana nga iti 2025 MMSU Film Festival ket pakaitampokan kadagiti creative skills dagiti film directors iti nasao nga unibersidad.
