LAOAG CITY – Nagkamang ditoy Bombo Radyo ni Mrs. Viena Cera, tubo iti ili ti Pasuquin ken OFW idiay Malaga, Spain gapo iti pannakamaltrato ti kabsat na a ni Crisencia Cera nga adda idiay Riyadh, Saudi Arabia.
Segun kenni Cera, idi maikapat pay laeng nga aldaw n Crisencia idiay Saudi ket natukkol ti abaga na gapo iti panangiduron ti amo na gapo ta maipagarop nga adda ti problema iti panagpanpanunut.
Gapo iti daytoy, inpa-ospital ti agency ngem saan pay a naana-anay a naka-recover ken nangabak da iti kaso.
Inbatad na a marigatan unayen ni Crisencia idia Saudi gapo ta saan unayen a makakuti ken bumbumsog ti rupa ken ima na.
Kalikagom ita ni Cera a maiyawid ditoy probinsya ti kabsat na gapo na saan nan a kabaelan ti agtrabaho iti nasao a pagilyan.
Nupay kasta, marigatan da gapo ta no agturong iti POLO idiay Saudi Arabia ket saan a ma-entertain isuna gapo ta ti prayoridad da ket dagiti run-away wenno dagiti agliblibas.
Inlawlawag ni Cera nga iti agdama ket adda iti agency ni Crisencia ngem ti pakaluksawan na ket saan a ti agency ti mangaksyon tapno matulungan ti kabsat na no diket daytoy pay laeng a mismo ti agturong iti POLO uray pilpilten na laengen ti bumangon tapno maiproseso ti panagawid na.
Innayon ni Cera a ngumat-ngato ti blood pressure ti kabsat na ken awan ti inted ti ospital nga uray anya nga agas.
Naamoan a ni Crisencia ket saan na nga iggem ti pasaporte na.
Kabayatanna, inbinsa-binsa ni Mrs. Geraldine Lucero, Communication Officer ti OWWA Region 1 dagiti masapol nga aramiden ti pamilya ni Crisencia Cera, maysa nga OFW idiay Saudi Arabia nga agsaksakit iti agdama ken dinangran ti amo na, tapno makaawiden daitoy pagilyan.
Segun kenni Lucero, agturong laeng ti kapamilya ni Cera iti OFW Desk iti kapitolyo probinsyal gapo ta adda dagiti porma a masapol a mapirmaan no sadinno a mailanad dagiti napapateg nga impormasyon.
Inlawlawag na a kalpasan daytoy ket ipatulod ti OFW Desk iti OWWA Region 1 ken ditoy a maaksyunan iti paspasaren ni Cera.
Saan met a maipasigurado ni Lucero no kasano ti kabayag ti pannaka-proseso ti kaso ni Cera gapo ta adda ti sursuruten da nga schedule no sadinno a ti aldaw ti panagipatulod da ti porma ket Martes, Miyerkules ken Huwebes.
Inbatad na a no maawat ti OWWA Regional ti porma ket dagus da a makikoordenar iti OWWA National nga isu a mismo ti mangkita wenno mangaksyon iti mapaspasamak kenni Cera.
