LAOAG CITY – Naluktan iti Surat Diamond Bourse idiay Gujarat, India ti baro a kadakkelan a pasdek iti intero a lubong nga addaan ti kalawa a 66,000 square feet.
Nadakdakkel daytoy ti 55,000 square feet maidasig iti Pentagon a 80 a tawen nga akin-iggem ti rekord kas kadakkelan a pasdek.
Ti 15 a kadsaaran a building complex ket bukbuklen ti siam a konektado ti maysa a central corridor. Iti balor a 32 billion rupees wenno $388 milyon, nadisenio daytoy tapno mapagtitipon dagiti artisan ken negosiante ti diamonds. Addaan daytoy ti 4,700 nga opisina, 131 nga smart elevators ken umdas nga espasyo para iti 65 a ribu a tattao.
Basar iti Morphogenesis, ti architecture firm a nangaramid ti disenio, ti kangrunaan a gagem ti proyekto ket agbalin nga eco-friendly ken sustainable no sadinno saanda a plano nga abaken ti Pentagon.
Naammoan a ti Surat Diamond Bourse ket saan laeng a pasdek no di ket simbolo ti balligi ti diamond industry ti India.
