LAOAG CITY – Pormal a binigbig ti Guinness World Records ti Minnesota Ice Festival gapu iti 18,148.88-square-foot nga ice maze a kadakkelan iti intero a lubong.

Ti maze a masarakan iti Tco Stadium iti Eagan ket addaan ti 8-foot tall a pader ken adu ti makaulaw a pasikut-sikot a sigurado nga agbalin a challenging kadagiti bisita.

Nagun-od daytoy ti rekord manipud iti dati a kadakkelan nga ice maze iti Buffalo, New York idi 2010 nga addaan ti sukat a 13,000 square feet.

Inbatad ni Robbie Harrell, Chief Excutive Officer ti Minnesota Ice, nangrugi ti pannakaipasdekna idi Disiembre 1, 2024.

Naammoan a tapno maprotektaran ti karuotan ti stadium, naikkan pay laeng ti graba ken plywood sakbay nga inpatakder ti maze.

Nausar ti 3,452 a bloke ti yelo nga agdagsen ti sumurok-kumurang a 425 pounds iti tunggal maysa tapno mabukel ti maze.

Nalpas ti proyekto idi Enero 4, 2025 kageddan daytoy ti panangikabil kadagiti ice sculpture ken silaw kas dekorasion.

Simmangpet ti opisial ti Guinness World Records tapno kumpirmaren ti rekord a nagbalin a balligi para iti Minnesota Ice Festival.

Plano dagiti organizer a luktan ti maze para iti publiko agingga inton Pebrero 16, depende iti sasaaden ti panawen.