LAOAG CITY – Naglikudan ni Barangay Kagawad Sammy Marcos, Officer In Charge ti Barangay Salet-Bulangon ditoy siudad ti Laoag nga adda ti mapukpukaw a pundo ti Sangguniang Kabataan iti barangayda.
Daytoy ket kalpasan nga adda ti naawat a reklamo ti Bombo Radyo Laoag babaen ti ipa-Bombo segment a maipagarup a nangiruar ti pundo ti Sangguniang Kabataan ti baro a Barangay Treasurer-da iti baet a nag-resign-en ti Sangguniang Kabataan Chairman-da.
Segun ken ni Barangay Kagawad Marcos, awan ti kinapudnona a mapukpukaw ti pundo ti Sangguniang Kabataan iti barangay-da.
Inbatadna a nag-resign ti Sangguniang Kabataan Chairman-da kalpasan a nakabiruk ti baro nga oportunidad wenno makastrek ti trabaho iti maysa a dakkel a mall ditoy siudad ti Laoag.
Inlawlawagna nga awan iti agdama ni Barangay Chairman Fernando Baracao Jr. gapu ta nagturong dagiti amin a Kapitan idiay Iloilo City tapno agatendar iti Lakbay Aral.
Kabayatanna, ikarkarigatan ti Bombo Radyo Laoag News Team nga alaen ti komento ti maseknan a baro a Treasurer ti Barangay Salet-Bulangon ditoy siudad ti Laoag maipanggep iti daytoy a banag.
