LAOAG CITY – Agtultuloy ti iwaywayat nga imbestigasyon dagiti kameng ti Philippine National Police (PNP) iti ili ti Vintar mainaig iti naipaanud a maladaga a nakita iti waig a paset ti Barangay Abkir iti nasao nga ili.
Daytoy ti inbatad ni Police Chief Master Sergeant Joey Aninag, ti chief investigator ti PNP iti nasao nga ili.
Segun ken ni Aninag, kabayatan ti panagmeryenda ti construction worker a ni Felipe Ramil ket ti maysa pay a kadwa na ket nakita da nga adda ti maiyan-anud a tao iti waig.
Inbaga na nga iti papanda panangkita ket ditoy a nadiskubre da a maladaga a babai.
Gapu iti daytoy, nangala da Ramil ti kayo nga isu ti inusar da a nangiyaon manipod iti danom ti pimmusayen a maladaga.
Mainaig iti daytoy, basar ken ni Doctor Heidy Marita Albano, ti Municipal Health Officer iti ili ti Vintar a possible a sumagmamano laeng nga oras ti napalabas sipud naipasngay ti nasao a maladaga.
Innayon na nga awan ti nakita a sugat ti maladaga isut gapuna a patien na nga asideg laeng ti nakaiyanudan na.
Immun-una iti daytoy, dinakamat ni Albano a nakisarsarita dan kadagiti nagduduma a barangay kangrunaan na dagiti barangay health workers tapno maamoan no siasinno dagiti masikog iti masakupan da a lugar.
Iti agdama, ti nasao a maladaga ket nagtalinaed iti Municipal Health Office iti ili ti Vintar ken maiyur-uray ti resulta ti imbestigasyon ti PNP ken ti mandar ti LGU para iti pannakaitabon daytoy.
