LAOAG CITY – Umanamong ti City Environment and Natural Resources ditoy ciudad ti Laoag iti nagbalin a rakurak ni Presidente Ferdinand Marcos Jr. a rumbeng nga adda ti maestablisar a water impounding system a pakaummongan ti tudo ken mausar intono panawen ti kalgaw.
Daytoy ti inbatad ni Miss Mylene Pascual, ti mangidadaulo iti City Environment and Natural Resources ditoy ciudad.
Kunana a daytoy nga addang ket maysa a wagas iti panagpreserba ti danom gapu ta no panawen ti kalgaw ket bumassit ti supply ti danom iti sumagmamano a lugar ditoy ciudad.
Inrakurak ni Pascual a no maurnong ti tudo iti panawen ti tudtudo ket dakkel a makatulong a mangsuposop iti kasapulan iti panawen ti kalgaw aglalo iti panagtalon.
Innayon na a sakbay pay a napanunot ti presidente daytoy nga addang ket addan ti immuna a panangilungalon ni Mayor James Bryan Alcid iti kastoy a proyekto.
Inpakaammo na nga adda ti manamnama a maestablisar a water impounding iti Brgy. Bacsil ditoy ciudad ken iti pannaka-renovate ti Laoag City Hall ket adda ti maaramid a rain water harvester facility.
