LAOAG CITY – Desidido ni Mrs. Russel Tungpalan Pimela a saan a mangikkat ti inpagaborna a darat iti maysa a dalan iti Brgy. Cabungaan-A ditoy siudad ti Laoag.
Segun kenkuana, daytoy ket kalpasan a saan pay pulos a nagpakpakita wenno napan nagatendar ti mairekreklamo a ni Mrs. Erlinda Paulino iti baet a napatuludan daytoy ti summon manipod iti barangay.
Inbatadna nga inaramidna daytoy a wagas tapno laeng mapilitan nga agkamang iti barangay hall ti maseknan tapno ditoyda nga agsasango ngem napaay latta isuna.
Inlawlawagna a namunganayan ti problema iti nagbaetanda kalpasan a pinagsawsaw-anda ti inana a ni Mrs. Loreta Tungpalan a mangipakita ti naan-anay a dokumento a pammaneknek nga isuda ti agtagikua ti maseknan a dalan.
Inpalgakna nga apaman a nagaburan ti dalan ket adda ti napan nagpala iti daytoy a kabagian da Mrs. Paulino no sadino ket binakalbakalda isuna agingga a natamaan ti rupana.
Mainaig iti daytoy, kuna ni Mrs. Loreta nga inpadonna daytoy a parikot iti Department of Agrarian Reform tapno malawlawagan ti nasao a banag.
Kabayatanna, kalikagum ni Brgy. Chairwoman Marilyn Resquir a masolbar daytoy a problema ngem marigatan met isuna iti pananggutigot ken ni Mrs. Paulino gapu ta saan daytoy nga agpakpakita iti barangay hall isu a sursurutenna ti umiso a proseso a maipakat.
Kamaudiananna, naammoan nga adda ti immun-unan a saanda a panagkikinnaawatan a patien ni Mrs. Pimela a daytoy ti rason nga isu ti paggurguraanda kadakuada.
