LAOAG CITY – Nangbukel ti Kamara de representantes ti 13 a komite iti babaen ti direktiba ni Speaker Bojie Dy III tapno mangaramid ti reporma ti maysa a “comprehensive package” kontra iti mapaspasaran a krisis gapu iti agtultuloy a panagngato ti presyo dagiti produkto a petrolyo.
Segun ken ni House Ways and Means Chairperson ken Marikina Rep. Miro Quimbo, gagem ti nasao nga addang a maaddaan ti organisado a sungbat ti pagilian iti babaen ti dua nga estratehiya.
Dagitoy ket ti panangipaay a dagus ti tulong kas ti supplemental budget para kadagiti apektado a sektor, ken panangipasigurado ti napaot a kinatalged ti ekonomiya.
Naikeddeng ti umuna a pormal a panagdengngeg dagiti komite intono Abril 8 tapno alisto a maipasa dagiti linteg a mangpalag-an ti epekto ti tension iti Middle East kadagiti Pilipino.
Inbatad ni Quimbo a pinalawa ni Speaker Dy ti 13 a komite a mangtutuk iti “unified legislative response” nti kababaan a pagpandayan linteg iti kongreso.
Segun ken ni Quimbo, kalikagom ni Speaker Dy a maaddaan ti organisado nga addang ti Kongreso katulungan da dagiti economic managers ti ehekutibo imbes nga agtitinnudo no siasinno ti rumbeng a pabasolen iti krisis.
Karaman iti 13 a komite nga agtitipon ket ti Energy, Agriculture, Foreign Affairs, Ways and Means, Labor, Transportation, ICT, Economic Affairs, Social Services, Trade and Industry, Overseas Workers Affairs, ken Appropriations.
Iti baet ti congressional break, kinumpirmaran ni Quimbo nga agtultuloy ti trabaho da ken agdaman a mangisaysayangkat kadagiti technical meetings kas panagsagsagana iti pormal a panagdengngeg iti sumaruno a lawas.
