LAOAG CITY – Ipangpangruna ti Kamara ti pagsayaatan ti dandani maysa a milion a mannursuro kadagiti pang-publiko a pagadalan iti pagilian.
Karaman ditoy ti panangingato ti sueldoda, kaadda ti kanayonan a benepisio, kanayonan a siled-pagadalan ken alikamen a kas iti computer.
Inwaragawag daytoy ni House Speaker Ferdinand Martin Romualdez kabayatan ti itatabunona iti selebrasyon ti “2024 National Teacher’s Month” a naangay iti Smart Araneta Coliseum idiay Cubao, Quezon City.
Segun kenni Romualdez, iti direktiba ni Presidente Ferdinand “Bongbong” Marcos Jr. ken babaen ti tulong ni Education Sec. Sonny Angara dagiti nadakamat a kari para kadagiti mangisursuro ket maikagumaan a matratar.
Inyunay-unay ni Romualdez, a rumbeng laeng a masubadan ti sakripisyo dagiti manursuro gapu ta dakkel ti pagrebbengan da iti kumunidad nangruna kadagiti estudyante a kalikagom na ti agballigi iti biag.
