LAOAG CITY – Naarestar ti maysa a kameng ti Bureau of Fire Protection gapu iti estafa wenno ti Benta Tangay Modus iti Barangay 11, Santa Balbina ditoy siudad ti Laoag.
Ti akusado ket agtawen ti 27, awanan asawa, bumbero, naidesignar iti Tuguegarao City Fire Station ken residente idiay 327 Manga St. Tanza, Tuguegarao City, Cagayan.
Basar iti imbestigasion, nakaawat ti Laoag City Police Station ti SMS flash alarm manipud iti Tuguegarao City Police Station a nagkiddaw iti panangtiliw ti maysa a Mitsubishi Expander nga agmaris ti nangisit gapu ta adda ti pakainaiganna iti estafa wenno ti Benta Tangay Modus.
Naammoan nga insigida a natiliw dagiti kameng ti 1st Provincial Mobile Force Company ti suspek babaen ti panangiwayatda ti checkpoint.
Kabayatanna, ti suspek ken ti lugan ket naikabil iti Laoag City Police Station para iti naan-anay nga imbestigasion.
Iti agdama, addan ti pannakikoordinar ti Laoag City Police Station iti Tuguegarao City Police Station para iti pannakai-turnover ti lugan ken ti driver.
