LAOAG CITY – Naduktalan ni Sangguniang Panlungsod Member Jason Perrera a saan a napilaan ti kaso iti panaglabsing ti anti drunk driving law ti kameng ti Philippine Coast Guard a nakadungpar iti maysa a mangisursuro a natay iti Barangay Vira ditoy siudad ti Laoag.
Segun kenkuana, apaman a nakisarsarita kadagiti kameng ti kapulisan, rumrummuar a ti rason ti saan a pannakaipila ti nasao a kaso ket gapu iti kinaawan ti gadgets a mausarda ken iti testing tapno mapaneknekan a daytoy ket adda ti impluwensia ti nasanger a mausar iti pannakaipila koma ti kaso kontra iti daytoy a driver.
Inbatadna a no saan a mapilaan ti kaso a panagsalungasing iti anti drunk driving law ti maysa nga indibidual ket nakurang nga innem a tawen laeng ti pannakaibaludna nga ibilang ti nasao nga opisial a nalag-an unay a maipataw aglalo no matay ti nadungpar.
Inlawlawagna a no mapaneknekan a nakainum daytoy ket mapilaan ti maiyannatop a kaso ken nadagdagsen ti pannusana ken awan ti maipaay a provision.
Kabayatanna, inrekomedar ti Committee on Laws ti mandatory testing, pannakaipaay ti breath analyzer nga awanan ita ti Laoag City Police Station, maipaayan ti jogger lane dagiti kalsada ditoy siudad malaksid iti bike lane, maipaayan ti signage dagiti kalsada a no ag-jogging ti maysa a tao ket rumbeng a mapan iti opposite direction tapno makitana dagiti umasideg ti ayanna a lugan, public dissemination, checkpoint ken pannakaimuntar kadagiti Close Circuit Television.
