LAOAG CITY – Paim-imbestigaran ni CIBAC Party-list Rep. Bro. Eddie Villanueva iti Kamara de Representantes ti ngumatngato a kaso dagiti kinaranggas kadagiti mangisursuro no sadinno a sumagmamano kadakuada ket nagresulta iti pannakatayda.
Kagiddan daytoy ket inpetteng ni Villanueva iti Department of Education (DepEd) ken dadduma pay a maseknan nga ahensia a mangiwayat ti comprehensive review iti implementasion ti Good Manners and Right Conduct (GMRC) ken Values Education Act of 2020.
Inpaganetgetna a makaalarma dagiti kaso ti panagdangran ken pammapatay kadagiti mangisursuro pakairamanan dagiti estudiante.
Kunana a dagiti pagadalan ket nasken a lugar ti pakaisuroan ken panangisagepsep ti kinatao dagiti ubbing isu a nasken a kanayon a natalged para iti amin nangruna kadagiti mangisursuro ken estudiante.
Innayon ni Villanueva ti panagtitinnulong iti nagbaetan dagiti nagannak, pagadalan, simbaan, komunidad ken gobierno tapno mapasayaat a mapadakkel a naimbag dagiti ubbing ken agbalin a nasingpet nga umili.
