LAOAG CITY – Naduktalan ti Commission on Audit nga adda sumagmamano nga “unverifiable” beneficiaries iti Department of Education voucher program para iti school year 2025-2026 a nagresultar iti P938,000 nga overpayment iti government assistance.
Basar iti Commission on Audit, a saanna nakumpirmaran ti 58 iti 5,507 a benepisiario a dimmalan iti validation manipud iti 571 senior high schools.
Pakairamanan kadagiti rason ti panag-drop-out, panagakar ti pagadalan, saan a panag-enroll iti second semester, pannakatay ken kinaawan ti school records.
Iti 58 nga unverified benificiaries, 32 ti nag-drop-out, 12 ti immakar ti pagadalan, 11 ti saan a nag-enroll iti second semester, dua ti nairekord a natay, ken maysa a benepisiario ti saan a nakita iti validation ken awan available a records.
Mainaig iti daytoy, nakairuaren ti bayad ti Department of Education kadagiti pagadalan ti 53 kadagiti unverified beneficiaries a nangitunda ti P938,000 nga overpayment.
Adda pakabuklan a 172,909 benepisiario ti Government Assistance to Students and Teachers in Private Education voucher program nationwide para iti school year 2025-2026, saan a karaman ditoy ti Bangsamoro Autonomous Region in Muslim Mindanao ken Negros Island Region.
Inpaganetget ti ahensia a mapukaw ti entitlement iti subsidy ti estudiante a nag-drop-out iti school year, basar iti Department Order No. 20, series of 2023.
Malaksid iti daytoy, masapul pay nga isubli ti participating schools iti Department of Education ti sobra a bayad.
Basar iti Commission on Audit a responsibilidad dagiti pagadalan nga i-update ti status dagiti estudienteda kagiddan ti pannakasayangkat met ti Department of Education ti kanayonan na verification.
Kabayatanna, inrekomendar ti Commission on Audit ti Department of Education a siguradoen a beripikado ti enrollment status ken pannakabigbig dagiti unverified beneficiaries ken siguradoen nga umno dagiti dokumento nga ipasa ti participating senior high schools.
