LAOAG CITY – Naragsak ni Governor Cecilia Araneta Marcos a nangpasangbay kadagiti kameng ti Philippine Travel Agencies Association iti ibibisita dagitoy iti Ilocos Norte.
Impatalged ti gobernador kadagiti kameng ti nadakamat a gunglo a ti industria ti turismo iti Ilocos Norte ket adda iti nasayaat nga ima babaen iti panangidaulo ni Mr. Aianree Raquel iti Ilocos Norte Tourism Office.
Ginutigotna dagitoy nga ag-invest iti Ilocos Norte ken agbalin a paset iti tarigagay a mangipaay iti naidumduma a padas kadagiti naayat nga agpaspasiar iti nadumaduma a lugar.
Impadanonna ti panangnamnama iti pannakataginayon ti napintas a panagtimpuyog ti Ilocos Norte ken dagiti kameng ti Philippine Travel Agencies Association.
Kabayatanna, nagyaman ti gobernador iti ibibisita ditoy Ilocos Norte ti agarup tallopulo a kameng ti Philippine Travel Agencies Association a pakairamanan dagiti Board of Trustees, agtagikua kadagiti travel agency, ken tour operators nupay kalkalpas pay laeng ti isasaplit ti bagyo Paolo a maysa kadagiti kapigsaan a bagyo a nangduprak iti probinsia.
Kagiddan daytoy, inbunannagna a maysa kadagiti nalatak ti naganna iti industria ti turismo iti Ilocos Norte ni Miss Angel Lao nga ibilbilangna a “cruise queen”.
Imbatadna a ni Lao ti agsagsagana iti panagsangpet dagiti nadumaduma a “cruise ship” ditoy probinsia.
Innayonna a maysa kadagiti kangrunaan a daydaywen dagiti turista iti Ilocos Norte ti “Himala sa Buhangin Festival” ken inyawisna kadagiti kameng ti Philippine Travel Agencies Association ti iyuumay dagitoy pannakidanggay iti nasao a festival a manamnama a maisayangkat ita a tawen iti umuna a lawas ti bulan ti Disiembre.
