LAOAG CITY – Natay ti maysa a kameng ti Philippine National Police a nangiturong ti Toyota vios kalpasan a nakadinnungpar na ti maysa a trailer truck iti national highway iti Barangay Mabusag Sur iti ili ti Badoc.
Daytoy ti kinumpirmaran ni Police Capt. Elison Pasamonte, ti chief of police iti ili ti Badoc.
Inbatad ni Pasamonte a ti biktima ket agtawen ti 40, naasawaan, residente iti Barangay Saud iti ili ti Badoc ngem agdama a naka-assign iti Philippine National Police iti ili ti Currimao idinto a ti nangiturong ti trailer truck ket agtawen ti 36, naasawaan, ken residente iti Zone 5 Caagaman, Aparri iti probinsya ti Cagayan.
Inlawlawag na a basar iti imbestigasyon da, kabayatan ti panagpapaamianan ti kotse nga inturong ti biktima ket nabittak ti goma iti akin-kannigig a ligay na a nangitunda ti pannakapukaw na iti kontrol ti manibela agingga a naikabil iti bangir a linya, no sadinno nga isu met ti isusungad ti agpaabagatan a trailer truck a nagresulta ti panagdinnungpar dagiti dua a behikulo.
Gapu iti napasamak, nagsagaba ti sugat iti nagduduma a paset ti bagi ti biktima aglalo iti ulo na, ken immuna naitaray iti pribado nga ospital iti Sinait, Ilocos Sur ngem naiyakar iti Mariano Marcos Memorial Hospital and Medical Center iti ciudad ti Batac, ngem pimmusay kabayatan a maag-agasan.
Saan met a naan-ano ti driver ti trailer truck nga iti agdama ket nagtalinaed iti Philippine National Police iti ili ti Badoc kabayatan a maisagsagana ti maipila a kaso a Reckless Imprudence Resulting in Homicide and Damage to property kontra kenkuana.
