LAOAG CITY – Kasapulan nga ibabawi ken saan laeng a masuspenso ti lisensya dagiti irresponsable a motorista a mairaman iti road rage ken dadduma pay nga aksidente iti kalsada tapno mapagtalinaed ti disiplina iti kalsada.
Daytoy ti inpetteng ni Senate President Francis “Chiz” Escudero iti baet ti nagsasaruno nga aksidente iti kalsada a nakatayan ti sumagmamano nga indibidual.
Segun pay iti senador, nagbalin nga uso a content iti online ti video dagiti kamote drivers ngem dagitoy ket saan a makaay-ayo no di makaperwisyo da iti kalsada.
Inpetteng ni Escudero a ti kinaawan ti disiplina iti kalsada ti kangrunaan a makaigapu ti problema iti trapiko ken aksidente iti pagilian.
Gapu iti daytoy, maysa a napintas nga umuna nga addang ti panangibabawi ti lisensya dagiti abusado a motorista tapno maaddaan ti kinaurnus iti kalsada.
