LAOAG CITY – Pinaigetan ti Bureau of Immigration (BI) ti kampanya na kontra iti human trafficking, aglalo kadagiti scheme a mangididiaya ti peke a trabaho iti sabali a pagilian kadagiti overseas Filipino workers (OFWs) ken agtungpal iti pannakapwersa da nga agtrabaho iti online scam hubs.
Segun ken ni Bureau of Immigration spokesperson Dana Sandoval iti maysa a forum iti Luneta Park, ado a Pilipino ti malukluko iti ilegal a recruitment ken saan a makapanaw iti pagilian gapu iti kurang wenno peke a dokumento, isut gapuna a ma-offload dagitoy iti airport.
Innayon na a naig-igeten ti border control ken passenger screening, ken ad-adda a pinapigsa ti Bureau of Immigration ti koordinasyon da iti National Bureau of Investigation, Department of Migrant Workers (DMW), ken dadduma pay ahensya tapno malapdan ti illegal recruitment ken trafficking networks.
Segun kenkuana, ado dagiti biktima a mgutgutigot iti online job ads a mangididiaya ti nangato a sweldo ngem agtungtungpal iti pannakpwersa da iti trabaho iti scam operations iti sabali a pagilian.
Innayon ti Bureau of Immigration nga agtultuloy ti rescue ken repatriation kadagiti Pilipino manipod kadagiti kastoy nga operasyon, a masansan ket adda ti kakuykuyog na a panagpangta, panangkumpiskar ti pasaporte, ken mapilit nga agtrabaho iti maaw-awagan a “fraud factories.”
