LAOAG CITY – Nangipila ti apela ti kampo ti dati a Presidente Rodrigo Roa Duterte iti International Criminal Court (ICC) kalpasan a nagkedked ti Pre-Trial Chamber I ti kiddawda nga interim release wenno temporario a pannakawaya-wayana.
Kinumpirmaran ti lead counsel ni Duterte a ni Atty. Nicholas Kaufman nga inpilada ti apela nga addan ti maysa a lawasen ti napalabas ken inawaganna a biddot ti nagbalin a desision ti korte.
Iti nairuar a 23 a panid a desision idi Setiembre 26, inpetteng ti International Criminal Court a kasapulan nga agtalinaed iti kustodiya ni Duterte tapno maliklikan a maapektaran ti imbestigasion ken dagiti proseso.
Nagkedkedan ti International Criminal Court ti argumento ti depensa a nasken a waya-wayaan ni Duterte gapu iti tawenna ken ti kasasaad ti salun-atna ken kunana nga adda ti umdas a serbisio medikal iti uneg ti International Criminal Court Detention Center.
Nupay kasta, basar iti kampo ti dati a Presidente, saan a maiyannatop ni Duterte a sumango iti panangtingiting gapu iti cognitive decline ngem kuna dagiti hues nga awan ti umanay nga ebidensia tapno paneknekan daytoy.
Kabayatanna, suportado ni Mamayang Liberal Party List Representative Leila de Lima ken sumagmamano nga human rights groups ti nagbalin a desision ti International Criminal Court ken inpettengna a pammaneknek laeng daytoy nga adda ti umdas a pangibasaran ti kaso kontra iti dati a Presidente.
Nagkedked a mangipaay ti komento ni Vice President Sara Duterte mainaig iti kaso ti amana ken kunana a nakapokus pay laeng isuna kadagiti biktima ti gingined idiay Davao Oriental.
