LAOAG CITY – Bwineltaan ti kampo ni dati nga Ako Bicol Party-list Rep. Zaldy Co nga illigal ti panangkumpiskar kadagiti agkakangina a lugan a konektado iti dati nga agpanpanday linteg.
Segun iti abogado ni Co a ni Atty. Ruy Rondain, napaay a nangipakita dagiti otoridad ti aniaman a legal a dokumento para iti pannakaisayangkat ti nasao nga operasyon idi sinaludsud na no addaan dagitoy ti search warrant.
Inpetteng pay ni Rondain a kinumpiskar pay dagiti otoridad dagiti tulbek ti agarop 34 a behikulo.
Innayon na a maipagarop nga inbatad pay dagiti otoridad nga adda ti naawat da nga alarma manipod iti Land Transportation Office (LTO), a kayatna a sawen ket hot car wenno nakarnap dagiti lugan, ngem saan da met a nasungbatan no siasinno ti nagreklamo no di ket inpetteng da nga ar-aramiden da laeng ti trabaho da.
Inpetteng ti abogado ni Co a saan a mabalin nga i-justify ti illigal nga operasyon iti babaen ti subsequent warrant of seizure.
Innayon na a binutbuteng ken kalpasan na ket inbalud da ti driver ti kliyente na iti nasurok a 12 nga oras.
Mainaig iti daytoy, inpalgak ti abogado ni Co nga agpila da ti kaso kontra kadagiti personalidad a karaman iti pannakakumpiskar dagiti lugan ken nangibalud kadagiti driver nga awan ti warrant nga inserbi da.
Maipalagip nga idi Huwebes ket inkabil ti Philippine National Police, Bureau if Customs ken Southern Police District ti 12 a nababalor a lugan a konektado ken ni Co iti compound ti Independent Commission for Infrastructure (ICI) no sadinno a walo ditoy ket sakupen ti seizure warrant idinto a dagiti dadduma ket nakumpiskar gapu iti alarma manipod iti Land Transportation Office.
