LAOAG CITY – Saan a mapatawan ti pannusa dagiti kandidato iti eleksion a saan a mangikkat ti campaign poster materials-da.
Segun ken ni Mr. Robert Fernandez, Election Officer iti ili ti Sarrat, awan ti maipataw a pannusa kadagiti saan a sumurot iti daytoy a mandar ti Commission on Elections gapu ta saanen nga epektibo ti Comelec rules ken nalpasen ti eleksion no sadinno dagiti pagannurotan ti Local Government Unit ti nangrugi manen a maipakat.
Nupay kasta, ikidkiddaw ti Commission on Elections kadagiti kandidato a maikkat amin a campaign poster materials-da kadagiti nagduduma a lugar pakairamanan dagiti online advertisement dagitoy.
Inlawlawagna a basar iti pammilin ti Commission on Elections ket addaanda ti lima nga aldaw sipod idi eleksion a mangikkat kadagitoy a banag.
Kunana a sipod idi kalman ket addan dagiti naobserbaranna a grupo dagiti kandidato ti nasao nga ili a mangisaysayangkat ti pannakaikkat dagiti campaign poster materials.
Innayonna a kalpasan ti lima nga aldaw wenno inton Mayo 17, inbatadna a nakisaritada kadagiti barangay officials iti ili ti Sarrat a no adda pay dagiti saan a naikkat ket isudan ti mangdalus dagitoy.
