LAOAG CITY – Agtultuloy ti clearing operation dagiti kameng ti Municipal Disaster Risk Reduction and Management Office (MDRRMO) iti ili ti Pagudpud.
Daytoy ti inpakaamo ni Mr. Hendrick Pendronan, ti mangidadaulo iti nasao nga opisina.
Segun ken ni Pedronan, saan a nalappedan ti nagsasaruno a panaglandslide partikular iti Barangay Pancian gapu iti napigsa a tudo.
Inbatad na nga immabot pay iti maysa ket gudwa a metro ti kangato ti lebel ti danom iti Barangay Saud, Balaoi, Caunayan, Burayoc, Poblacion ken Subec gapu iti napigsa a danom a naggapo iti bantay.
Mainaig iti daytoy, kuna ni Pedronan nga adda ti dua a pamilya nga agnanaed iti igid ti karayan ti naibakwit.
Innayun na a naiget ti pannakikoordinar ti lokal a gobierno iti ili ti Bangui ken manamnama ti pannakaibunong ti food packs kadagiti naapektaran iti panaglayus.
