LAOAG CITY – Nauram ti maysa a kapilya ken nairaman pay ti pick-up, van ken tricycle iti Barangay Mumulaan iti ili ti Paoay.
Basar iti impormasyon a nakalap ti Bombo Radyo Laoag, ti akinkukua kadagiti nauram ket ni Pastor Jhonny Sacayanan ken Elizabeth Sacayanan.
Naamoan nga awan ti tao iti uneg ti kapilya gapo ta dagiti maseknan ket makumikom nga aglaklako iti mini grocery da.
Segun kenni Mr. Jefferson Daysor, maysa a tricycle driver ken residente iti nasao a barangay, mapan agitulod iti pasahero na idi adda ti maysa a kagawad nga agpukpukaw nga adda ti uram iti nasao a kapilya.
Kunana a dagus na met a napan kinita daytoy no sadinno dakkelen ti apoy ken inbaga na kadagiti tattao nga adda iti asideg ti nakapasamakan ti uram a tumawag da iti Bureau of Fire Protection.
Mainaig iti daytoy, saan met pay a makaipaay ti komento da Pastor Sacayanan seknan iti nasao a pasamak.
Kabayatanna, naamoan nga 9:36 itay bigat ket naideklara a fire out ti uram ken manarimaan met laeng ti imbestigasyon dagiti kameng ti Bureau of Fire Protection no anya ti namunganayan ti uram.
